చిరంజీవి ‘విశ్వంభర’ మరోసారి వాయిదా? సెప్టెంబర్ 25న విడుదలపై పక్కా ప్లాన్!
మెగాస్టార్ చిరంజీవి నటిస్తున్న సోషియో ఫాంటసీ చిత్రం ‘విశ్వంభర’ మరోసారి వాయిదా పడే సూచనలు కనిపిస్తున్నాయి. సంక్రాంతి సందర్భంగా రిలీజ్ చేయాలని మేకర్స్ ముందు నుంచి ప్లాన్ చేసినా, తాజాగా అందుతున్న సమాచారం ప్రకారం సెప్టెంబర్ 25న విడుదల చేసే ఆలోచనలో ఉన్నారట.
గ్రాఫిక్స్ మీద భారీ దృష్టి
ఈ మూవీకి ప్రధానంగా ఆలస్యం అవుతోన్న కారణం వీఎఫ్ఎక్స్ వర్క్. గతంలో విడుదలైన టీజర్‌పై వచ్చిన నెగటివ్ కామెంట్లతో అప్రమత్తమైన మేకర్స్, ఇప్పుడు హాంకాంగ్ మరియు హైదరాబాద్‌లోని టాప్ వీఎఫ్ఎక్స్ స్టూడియోలతో కలిసి పనులు చేస్తున్నారు. కేవలం గ్రాఫిక్స్ కోసమే రూ.75 కోట్లు ఖర్చు చేస్తున్నారు అనే సమాచారం చిత్ర పట్ల మేకర్స్ తీసుకుంటున్న కమిట్‌మెంట్‌ను చెప్పకనే చెబుతోంది.
ఇంకా మిగిలిన పనులు
వీఎఫ్ఎక్స్‌తో పాటు, కొన్ని కీలక షూటింగ్ షెడ్యూల్స్, రీ-రికార్డింగ్, పోస్ట్ ప్రొడక్షన్ పనులు కూడా పూర్తి కావాల్సి ఉంది. అనుకున్న దానికంటే పనులు ఆలస్యం కావడంతో, మేకర్స్ కొత్త రిలీజ్ డేట్‌పై మళ్లీ ఆలోచనలో పడ్డారు. ఇప్పటివరకు ఈ సినిమా జనవరి, మే, జులై, ఆగస్ట్ తేదీలను టార్గెట్ చేసుకున్నా… చివరికి సెప్టెంబర్ 25 డేట్‌పై ఫిక్స్ అయ్యే అవకాశం ఉందని ఇండస్ట్రీ వర్గాల్లో టాక్.
చిరంజీవికి మరో ‘జగదేక వీరుడు’?
చిరంజీవి కెరీర్లో ‘జగదేక వీరుడు అతిలోక సుందరి’ ఎంత పెద్ద హిట్‌గా నిలిచిందో తెలిసిందే. ఇప్పుడు 35 ఏళ్ల తర్వాత వస్తున్న మరో సోషియో ఫాంటసీ మూవీ కావడంతో, ‘విశ్వంభర’ పై అభిమానుల్లో భారీ అంచనాలున్నాయి. ఇటీవల శ్రీరామనవమి సందర్భంగా విడుదల చేసిన ‘రామ రామ’ భక్తి పాట మంచి స్పందన పొందింది.
అభిమానుల నిరీక్షణ
తరతరాల నుంచి చిరు అభిమానులు ఒక గొప్ప విజువల్ వండర్ కోసం ఎదురుచూస్తున్నారు. అయితే వాయిదాల వల్ల కొంత నిరాశగా ఉన్నా, మేకర్స్ తీసుకుంటున్న క్వాలిటీ కేర్ చూసి ఫ్యాన్స్‌కు నమ్మకం కలుగుతోంది. ట్రైలర్ రిలీజ్‌తో మరింత క్లారిటీ వచ్చే అవకాశం ఉంది.