చిరకాల నిరీక్షణకు చెక్ పెట్టింది రాయల్ చాలెంజర్స్ బెంగళూరు. 18 ఏళ్ల కలను నెరవేర్చుకుంటూ RCB తొలిసారిగా ఐపీఎల్ ట్రోఫీని సొంతం చేసుకుంది.
.ఐపీఎల్ 2025 ఫైనల్‌ మ్యాచ్‌లో పంజాబ్ కింగ్స్‌ను ఓడించి చారిత్రాత్మక విజయాన్ని సాధించింది. మొదట బ్యాటింగ్ చేసిన RCB జట్టు, 190 పరుగుల గట్టి స్కోరు చేసింది. విరాట్ కోహ్లీ (43), మయాంక్ అగర్వాల్ (24), పాటీదార్ (26), లివింగ్‌స్టోన్ (25), జితేశ్ శర్మ (24)లు సమిష్టిగా రాణించగా, చివర్లో రొమారియో షెఫర్డ్ బలమైన హిట్టింగ్‌తో స్కోరు పెంచాడు.
ఆ తర్వాత బౌలింగ్‌లో సీరియస్ అటాకింగ్‌తో పంజాబ్‌ను కట్టడి చేశారు. భువనేశ్వర్ కుమార్, కృనాల్ పాండ్యా తలో రెండు వికెట్లు పడగొట్టగా, హేజిల్‌వుడ్, షెఫర్డ్, యశ్ దయాల్ తలో వికెట్ తీసి దుమ్మురేపారు. శశాంక్ సింగ్ (61*) ఒంటరిగా పోరాడినా, మిగిలిన బ్యాటర్లు నిరాశపరిచారు. ఓ దశలో పంజాబ్ చేతిలో మ్యాచ్ జారిపోతుందేమో అన్న అనుమానాలను పారదోలుతూ, ఆర్సీబీ చివరి వరకూ ఒత్తిడిని తట్టుకొని విజయం సాధించింది.
ఈ విజయంతో ‘ఈ సాలా కప్ న‌మ్దే’ అనే నినాదం నెరవేరింది. 2009, 2011, 2016లో ఫైనల్‌కు చేరినా, మూడు సార్లు టైటిల్‌ను తృటిలో కోల్పోయిన ఆర్సీబీ – ఈసారి మాత్రం ఊహించని స్థాయిలో ఆటతీరు చూపింది. జట్టు సభ్యుల సమిష్టి శ్రమ, కోహ్లీ నాయకత్వం, అభిమానుల అండతో మొదటిసారి ట్రోఫీని ముద్దాడింది. ఫైనల్‌ అనంతరం కోహ్లీ భావోద్వేగంతో కన్నీళ్లతో ట్రోఫీని ఎత్తిన దృశ్యం అభిమానుల హృదయాలను హత్తుకుంది.
ఈ విజయానికి వెనుక ఎన్నో పోరాటాలు, అవమానాలు, గెలవలేకపోయిన క్షణాలు ఉన్నాయి. కానీ అవన్నీ ఇప్పుడు గతమే. అభిమానుల ఆశలన్నింటికీ నిజం చేసిన ఈ రోజు, ఆర్సీబీ చరిత్రలో అత్యంత గొప్ప రోజుగా నిలిచిపోతుంది. పంజాబ్ కెప్టెన్ శ్రేయాస్ అయర్ క్రమబద్ధంగా జట్టును నడిపించినా, ఫైనల్‌లో ఆ పటుత్వాన్ని చూపలేకపోయాడు.
ఇకపై “RCBకి కప్పు రావడం అసాధ్యం” అనే అపవాదు చరిత్రలోకి చేరిపోయింది. ఇప్పుడు RCB అనగానే గుర్తొచ్చేది ఆ గొప్ప గెలుపు, కోహ్లీ ఆనంద భాష్పాలు, అభిమానుల ఆనందాలే. ఈ గెలుపు కేవలం ఓ టైటిల్ కాదు – కోట్లాది అభిమానుల మనసుల్లో వెలసిన కలకు న్యాయం చేసిన చరిత్ర!